آخر تحديث: أكتوبر 2026
الخلاصة: غرامات مخالفات المرور في مصر بتبدأ من 100 جنيه لمخالفات زي حزام الأمان والموبايل، وبتوصل لـ 3,000 جنيه مع الحبس في مخالفات زي السير عكس الاتجاه، والغرامة بتتضاعف لو كررت المخالفة خلال 6 شهور. تقدر تستعلم عن مخالفات عربيتك وتدفعها أونلاين من موقع النيابة العامة للمرور، ولو شايف إن في مخالفة غلط تقدر تتظلم عليها أونلاين برضه.
إزاي تستعلم عن مخالفات عربيتك وتدفعها؟
- ادخل على موقع النيابة العامة للمرور ppo.gov.eg واختار خدمات المرور.
- اختار مخالفات رخصة المركبة (العربية) أو مخالفات رخصة القيادة.
- اكتب رقم اللوحة أو بيانات الرخصة، وهيظهرلك إجمالي المخالفات وتفاصيل كل مخالفة.
- ادفع بالفيزا أو بطاقة ميزة من نفس الموقع.
مهم تستعلم قبل ما تجدد رخصة العربية، لأن لازم تدفع المخالفات الأول.
إزاي تتظلم على مخالفة أونلاين؟
- من موقع النيابة العامة للمرور ادخل على خدمة المخالفات (استعلام – تصالح – دفع – تظلم)، واختار مخالفات رخصة المركبة أو مخالفات رخصة القيادة، واكتب رقم اللوحة أو الرخصة وبيانات المالك.
- اختار المخالفة اللي عايز تتظلم عليها واكتب السبب.
- ابعت الطلب واحتفظ برقمه، وتابعه من خدمة «متابعة الطلب» على نفس الموقع.
لو التظلم اتقبل المخالفة بتتشال، ولو اترفض بتفضل عليك وتدفعها عادي. تقدر كمان تتظلم من نيابات المرور.
جدول أهم مخالفات المرور وغراماتها 2026
| المخالفة | الغرامة |
|---|---|
| عدم ربط حزام الأمان (للسواق والراكب اللي جنبه) | من 100 لـ 300 جنيه |
| استخدام الموبايل في إيدك أثناء السواقة | من 100 لـ 300 جنيه |
| عدم وجود طفاية حريق صالحة أو المثلث العاكس أو شنطة الإسعافات في العربية | من 100 لـ 300 جنيه |
| استخدام الكلاكس من غير داعي، أو الوقوف أو السير ببطء شديد على الكباري وفي الأنفاق والتقاطعات | من 100 لـ 1,000 جنيه |
| تجاوز الحد الأقصى للسرعة | من 300 لـ 1,500 جنيه، وممكن حبس لحد 6 شهور |
| تعمد تعطيل حركة المرور، أو السواقة بفرامل مش صالحة، أو الاعتداء على فرد المرور | من 300 لـ 1,500 جنيه، وممكن حبس لحد 6 شهور |
| السير في مسار مخالف، أو عدم اتباع إشارات المرور وتعليمات رجل المرور | من 500 لـ 1,000 جنيه |
| إلقاء مخلفات في الطريق، أو دخان كثيف أو أصوات مزعجة من العربية | من 500 لـ 1,500 جنيه |
| الوقوف بشكل بيعطل حركة المرور من غير داعي | من 500 لـ 2,000 جنيه |
| السواقة بدون رخصة قيادة أو برخصة منتهية أو مسحوبة | من 1,000 لـ 2,000 جنيه، وممكن حبس لحد 6 شهور |
| السواقة بعربية من غير رخصة تسيير | من 1,000 لـ 2,000 جنيه، وممكن حبس لحد 6 شهور |
| السير عكس الاتجاه | من 1,000 لـ 3,000 جنيه، مع حبس لا يقل عن سنة |
قيمة الغرامة النهائية بتتحدد حسب الحالة، والرقم الدقيق المسجل على عربيتك بيظهرلك لما تستعلم على موقع النيابة العامة للمرور. ولو ركنت في مكان ممنوع الوقوف فيه بشكل بيعطل المرور، من حق المرور يقفل العربية بكلابش لحد ما تتسحب، ويحرر لها مخالفة.
أسئلة شائعة
إزاي أعرف إذا كان على عربيتي مخالفات؟ ادخل على موقع النيابة العامة للمرور واكتب رقم اللوحة، وهتظهرلك كل المخالفات المسجلة وقيمتها.
هل أقدر أتظلم على مخالفة غلط؟ أيوه، أونلاين من خدمة المخالفات على نفس الموقع، وتقدر تتابع طلبك من «متابعة الطلب».
أقدر أتصالح وأدفع أقل؟ في أغلب المخالفات أيوه. لو اتصالحت فورًا أو خلال 3 أيام عمل من تاريخ المخالفة بتدفع نص الحد الأدنى للغرامة بس، ولو اتصالحت بعد كده أمام النيابة بتدفع الحد الأدنى. في مخالفات ماينفعش فيها التصالح، زي السير عكس الاتجاه والقيادة تحت تأثير المخدرات.
هل صحيح الغرامات وصلت 15 ألف جنيه؟ لأ، ده تعديل مقترح على القانون ولسه ماتعتمدش. الغرامات اللي في الجدول هي المطبقة دلوقتي، ولو التعديل اتعتمد هنحدّث المقال.
لازم أدفع المخالفات قبل تجديد الرخصة؟ أيوه، مش هتقدر تجدد رخصة العربية إلا بعد سداد المخالفات. اعرف خطوات التجديد ورسومه في مقال رسوم ترخيص السيارات 2026.
بتدور على عربيتك الجاية؟ تصفح عربيات سيلندر المستعملة