رسوم تسجيل السيارات في الشهر العقاري
أعلنت مصلحة الشهر العقاري عن زيادة في أسعار تسجيل السيارات وصلت من 10% ل 70%!
الرسوم دي بتدفع عند نقل الملكية أو تسجيل البيع في مصلحة الشهر العقاري عشان تقدر تسجل السيارة باسمك في المرور بعد كده.
تقدر تعرف الرسوم النسبية لموديل السيارة وعدد السليندرات من الجدول ده؛ مع العلم إن السيارات اللي مقدمة من علامات تجارية فخمة بتدخل تحت بند الفئات الخاصة.
رسوم ترخيص السيارات
بعد سداد رسوم التسجيل في الشهر العقاري وإجراءات تسجيل عقد البيع، هيجي دور إنك تنقل وتجدد رخصة السيارة باسمك في المرور -التابع لمكان إقامتك-.
أول خطوة هي استخراج شهادة مخالفات وسداد المخالفات المتعلقة على السيارة ودي ممكن تدفعها في البريد أو أون لاين أو مكتب تابع للمرور.
- بعد كده بتدفع رسم الضريبة حسب سعة السيارة اللترية (CC) حسب التقسيمة دي:
- السيارة اللي سعتها اللترية أكتر من 1030 وأقل من 1330 سي سي فالضريبة عند تجديدها لمدة سنة هتكون 225 جنيه.
- السيارة اللي سعتها اللترية أكتر من 1330 وأقل من 1630 سي سي فالضريبة عند تجديدها لمدة سنة هتكون 750 جنيه.
- السيارة اللي سعتها اللترية أكتر من 1630 وأقل من 2030 سي سي فالضريبة عند تجديدها لمدة سنة ممكن توصل ل 3000 جنيه.
- السيارة اللي سعتها اللترية أكتر من 2030 سي سي فالضريبة بتقدر بقيمة 2.5% من قيمة السيارة.
- رسوم التأمين الإجباري 300 جنيه عن كل سنة ترخيص.
- رسوم إنشاء وتطوير منظومة النقل الذكي، بتقدر من 60 إلى 350 جنيه حسب السعة اللترية لكل سيارة.
- رسوم الملصق الإلكتروني ب 250 جنيه.
- طفاية حريق ب 450 جنيه.
- حقيبة إسعافات أولية ومثلث عاكس ب 250 جنيه.
- رسوم تسجيل بيانات صاحب السيارة على الجهاز ب 400 جنيه.
في حالة السيارة الزيرو هتكون نفس الخطوات، ولكن بدون شهادة المخالفات طبعًا وهيزيد على الخطوات دي أنك هتقدم الفاتورة الضريبية وشهادة الإفراج الجمركي لو كانت السيارة مستوردة أو الموافقة من هيئة التنمية الصناعية لو كانت السيارة مصنعة محليًا.
رسوم تجديد رخصة القيادة
بنسبة لرخصة القيادة فالرسوم أوضح شوية ومن غير تقسيمات كتير هنقولك الخطوات لاستخراج رخصة القيادة والرسوم المطلوبة في كل خطوة.
- أول حاجة لو بتجدد الرخصة هتدفع الأول مخالفات القيادة اللي عليك ورسوم الخدمة دي 50 جنيه بالإضافة لقيمة المخالفات طبعًا، ممكن تعرف أكتر عن أنواع المخالفات من المقال ده (لينك للمقال بتاع المخالفات) ولو بتستخرج الرخصة لأول مرة مش محتاج تعمل الخطوة دي.
- هتروح مقر المرور حسب العنوان اللي في بطاقة الرقم القومي وتصور البطاقة 3 نسخ على الأقل، هتشتري حافظة أو ملف عند البوابة ب 35 جنيه.
- هتشتري برضه شهادة بيانات ب 125 جنيه.
- هتاخد دور في الكشف الطبي لتحديد قوة النظر وكشف الباطنة وده رسومه 285 جنيه.
- هتروح للشباك المختص علشان تشتري نموذج 256 طلب الحصول على الرخصة ب 30 جنيه.
- هتروح بعد كده لاختبار الإشارات على الكمبيوتر وده رسومه 10 جنيه.
- ولو لأول مرة هتروح عشان الاختبار العملي للقيادة.
- بعد كده هتروح بعد ما تخلص الاختبارات وشراء الأوراق اللازمة للشباك المختص، هيراجع الورق وهيديك وصل دفع ضريبة في الخزنة اللي عبارة عن:
- رسوم تنمية موارد الدولة ب 615 جنيه.
- رسوم نموذج استخراج رخصة قيادة ب 6.5 جنيه.
- رسوم طابع شرطة ب 15 جنيه.
- أخر خطوة هي أنك هتروح تتصور الصورة اللي هتتحط على الرخصة (متنساش تبتسم) وتستنى يندهوا عليك عشان تستلم الرخصة ويبقى مبروك عليك!
بكده نكون استعرضنا رسوم وخطوات تجديد رخصة السيارة ورسوم وخطوات تجديد رخصة القيادة كمان، قلنا في التعليقات لو بتواجهك رسوم تاني بتكون مستخبية أو خطوات إضافية اضطريت تعملها.
