التقسيط المباشر عن طريق معرض

من أسرع الطرق لتقسيط السيارات المستعملة هي التقسيط بشكل مباشر مع معارض السيارات المستعملة، حيث إنهم في الغالب بيسرعوا الإجراءات والاستعلام، ومش بيطلبوا تأمين إجباري على السيارة، كمان مفيش استعلامات للملف الائتماني (I-Score) ومفيش اعتبار لنسبة عبء الديون (DBR)، واللي معناها نسبة الأقساط والديون من إجمالي الدخل قد ايه، واللي بيتم الالتزام بتعليمات البنك المركزي في الطرق التانية، إن إجمالي الديون والأقساط لازم متتعداش نسبة الـ 35% لـ 50% من الدخل. 

بالإضافة إن مفيش شروط معينة لعمر السيارة ومفيش حد أقصى لسنة إنتاجها. 

كل دي مميزات كويسة لكن ده بيجي مع شوية عيوب أو مساوئ للتقسيط المباشر من المعارض، على رأسها هي قصر مدد التقسيط المتاح فأقصى مدة للتقسيط بتكون من 6 شهور لسنة واحدة بس في الغالب، وبالتالي المعارض بتخلي أقل مقدم ممكن تدفعه كبير شوية، من 40% ل 50% من سعر السيارة، وكمان سعر فايدة بيكون عالي جدًا، بجانب حظر البيع لحين انتهاء مدة التقسيط. 

التقسيط المباشر مع المعارض يعتبر حل كويس للي بيدور على سيارة مستعملة بالتقسيط من غير ما يلف كتير أو مش عايز يتعب في الإجراءات وعايز يتجنب الاحترازات البنكية، لكن في نفس الوقت هيقدم تضحيات في نسبة الفايدة العالية والمقدم الكبير برضه. 

التقسيط عن طريق شركات التمويل

تاني طريقة لتقسيط السيارات المستعملة هي الشراء عن طريق شركات التمويل اللي انتشرت جدًا مؤخرًا وبقى في خيارات كتير جدًا سواء كانت الشركات دي بتقدم خدماتها عن طريق تطبيقات موبايل أو عن طريق مواقع.   
هنا بقى الفايدة بتكون من 30% لـ 38% -وفي عروض على نسبة الفايدة بتصل لـ 15% فايدة- حسب برنامج التقسيط وشروطه، والمقدم بيبدأ من 20%، وأحيانًا بيكون في عروض من غير مقدم خالص، والميزة هنا كمان إن التقسيط يمكن أنه يمتد ل 7 سنين. 

لكن شركات التمويل بتلتزم زي البنوك بال (DBR) والـ (I-Score) اللي شرحناها قبل كده؛ كمان شركات التمويل غالبًا هتطلب تأمين إجباري على السيارة حسب قيمة المقدم. والجدير بالذكر إن لازم هيكون في اشتراطات على عمر السيارة في الغالب بتكون 9 سنين عند انتهاء التقسيط. 

وبالنسبة للإجراءات فبتكون هنا أبطأ شوية، فشركات التمويل في العادي بتطلب فحص من مركز معتمد متعاقدة معاه وكذلك تسعير معتمد، وأحيانًا بتاخد ضمانات أكبر زي الشيكات. أما حظر البيع فبيكون حسب برنامج التقسيط اللي بيختاره المشتري.  

  التقسيط عن طريق شركات التمويل يعتبر حل مناسب لقطاع كبير من المشترين اللي بيدوروا على سيارات مستعملة إنتاج حديث شوية ومعندهمش مشكلة مع ال (DBR) وال (I-Score) ولا مشكلة إنهم يصبروا شوية في الإجراءات مقابل فايدة ومقدم معقولين.

التقسيط عن طريق البنك

  تقسيط السيارات عن طريق البنك متشعب وفيه أكتر من طريقة وكل واحدة منها لها مميزاتها وعيوبها، لكن مهم تعرف إن المشترك بينهم هو إن بشكل عام البنوك أقل فايدة من كل الخيارات السابقة، وأكيد بتلتزم البنوك بال (DBR) وال (I-Score)؛ وهنعرف أكتر دلوقتي عن كل طرق التقسيط عن طريق البنك:

قرض السيارة المستعملة:  

أكتر الطرق شيوعًا هي شراء سيارة بالتقسيط عن طريق قرض السيارة المستعملة من البنك، عشان الفايدة بتاعتها تنافسية بتبدأ من 23% ل 32% حسب أوراق المشتري وطريقة سحب القسط. بعض البنوك بتقدم تمويل لـ 100% من قيمة السيارة، يعني من غير مقدم خالص وبرضه ده حسب أوراق المشتري وطريقة سحب القسط، ولكن في العادي المقدم بيكون من 20 ل25% وبتختلف من بنك لبنك. 
أكبر ميزة لقرض السيارة هي بالتأكيد مدة التقسيط اللي بتوصل ل 8 سنين في بعض البنوك. 

الإجراءات في قرض السيارة المستعملة طويلة شوية، والاشتراطات أكتر برضه، يعني في الغالب لازم هيكون في تأمين إجباري على السيارة وممكن يتشال الشرط ده في بعض البنوك لو المقدم كبير؛ كمان في حظر بيع لحين انتهاء مدة التقسيط. 

لكن أصعب اشتراط إضافي من البنوك بيكون على عمر السيارة المستعملة أقصاه 7 أو 5 سنين وأحيانًا كمان في اشتراط إن بلد المنشأ متكونش الصين. كمان في شرط إن السيارة اللي أنت عايز تشتريها تكون في معرض سيارات والبنك بياخد عرض أسعار من المعارض وفحص معتمد وبيمول شراء السيارة، لكن ده بيختلف شوية في الطريقة جاية. 

مرابحة السيارة المستعملة: 

المرابحة زي الطريقة اللي فاتت بالظبط في كل حاجة تقريبًا، الفرق إن المرابحة بتم بعد ما البنك بياخد عرض الأسعار بيشتري السيارة وبتكون في حيازته بعد الاتفاق معاك على هامش ربح -اللي هو بيعادل الفايدة- وبيتم تقسيمه مع قيمة السيارة على عدد شهور مدة التقسيط. 

الفرق بين المرابحة والقرض إن الهامش الربح بيكون أعلى شوية من الفايدة وفي الغالب لازم يكون في مقدم بحد أدنى 25%، وبنوك كتير بتقلل عمر السيارة المقبول لسنتين. 
واضح إن شروط وإجراءات البنوك كتيرة ومعقدة، لكن في مشترين حاولوا يقللوا من الإجراءات، حتى لو قدموا بعض تضحيات زي ما هنعرف في الطريقة اللي جاية. 

القرض الشخصي: 

ممكن يكون غريب شوية إننا حطينا القرض الشخصي ضمن طرق تقسيط السيارات المستعملة، لكن دي طريقة شائعة دلوقتي وبيستخدمها المشترين اللي عايزين يقللوا من وقت وكترة الإجراءات عن طريق إن المشترين بياخدوا القرض ويدفعوا كاش للبائع -أيًا كان مين هو البائع- ويقسطوا قيمة القرض وفايدته للبنك. 
لكن ايه الفرق بين قرض السيارة والقرض الشخصي؟ 

على الرغم إن القرض الشخصي بيتطلب ضمانات أكبر وأكتر من قرض السيارة، لكن المشترين ممكن يتجهوا للقرض الشخصي عشان سرعة الإجراءات وحرية الاختيار بين البائعين والاتفاق الودي على السعر، وطبعًا الأهم هو عدم وجود حظر بيع أو تأمين إجباري.  

طب كده القرض الشخصي أحسن؟ 
بالتأكيد في جوانب أخرى للقرض الشخصي، أولها الفايدة الأعلى طبعًا وإن مبلغ القرض الشخصي الكافي لشراء سيارة في ظل الارتفاع الحالي في الأسعار بيتطلب ضمانات كبيرة جدًا اللي بيخلي القروض الشخصية عالية الخطورة في حالة التأخر أو عدم السداد واللي بدوره بيقلل جدًا في (I-Score). وكمان مدة القرض في الغالب بتكون أقل، فبالتالي القرض الشخصي بيكون خيار مش متاح للجميع. 

سيلندر بتقسط إزاي؟ 

سليندر بتقدم تقسيط السيارات المستعملة بطرق ذكية وشاملة وبتحاول تجمع مميزات كل طريقة من الطرق اللي ذكرناها، فسليندر بتقدم تقسيط عن طريق شركات التمويل وعن طريق البنوك المتعاقدة معاها اللي بتقدم نظام القرض أو نظام المرابحة، وكمان بتسهل الإجراءات جدًا لدرجة أنك ممكن تظن إن مفيش إجراءات يعتبر، فعلى سبيل المثال: 

• فحص السيارة المعتمد بيكون معمول وجاهز بالفعل وكمان التسعير المطلوب من البنوك.
•  الموافقة على التقسيط من الجهة الممولة بياخد أقل مدة ممكن تصل لساعتين أو 48 ساعة كحد أقصى. 
• مش محتاج تزور مقر سليندر لإنهم بيتواصلوا مع الجهة الممولة بالنيابة عنك وبيخلصوا بقية الإجراءات اللي مش محتاجة وجودك فعليًا.  
• ضيف على ده إن أحيانًا بيكون في عروض وتسهيلات على المقدمات بتصل لصفر% مقدم. 
• وكمان بعض برامج التقسيط المتعاونة مع سليندر مش بتفرض حظر بيع على السيارة. 

وبكده نكون استعرضنا ليك أفضل 4 طرق لشراء سيارة مستعملة بالتقسيط في 2025، وشوفنا مميزات وعيوب كل طريقة من الطرق دي، وايه من الطرق دي ممكن يناسب مين من المشترين. قلنا في التعليقات أنت شايف ايه أنسب وأفضل طريقة تقسيط من وجهة نظرك؟