كيفية الكشف على شاسيه السيارة وفحص هيكل وجسم السيارة

هنبدأ المقال بفحص الهيكل والجسم. لازم تبقى عارف إن ده أهم جزء في حالة السيارة المستعملة، مش عشان هو أهم جزء في عملية تشغيل السيارة، قد ما السوق السيارات المستعملة المصري بيفرق معاه جدًا حالة هيكل السيارة (شاسيه – Chassis) وجسم السيارة الخارجي (Body)، وإن كان تم عليهم إصلاحات سابقة قبل كده ولا لأ؛ لإن ده كفيل يقلل من سعر السيارة جدًا وفي بعض الحالات بيكون صعب بيعها.

وعلى الرغم إن الاهتمام الزيادة بحالة الشاسيه وهيكل السيارة -على حساب حاجة أساسية جدًا زي الموتور مثلًا- يبدو غريب شوية، إلا أنه يحمل شئ من الصحة لو بس الموضوع وصل إن السيارة متترخصش وتبقى فعليًا مجرد خردة! غير كده إصلاحات الهيكل موجودة ومقبولة في كل مكان في العالم.

ازاي تعرف إن السيارة مغيرة ربع أو نص؟ 

يقال على بعض العربيات إنها مغيرة ربع أو نص، معناها إن السيارة عملت حادثة كبيرة واضطر المالك إنه يغير نص الشاسيه.

تغيير ربع أو نص للعربية ممكن يوصل العربية إنها تكون غير قابلة للبيع لأن في كتير من الأحيان التغيير بدون موافقة أو إخطار إدارة المرور بيخلي العربية غير قابلة للترخيص.

عشان تكشف لو العربية مغير نص لازم تلاحظ  حالة الشاسيه من تحت العربية. لو فيه خط لحام واضح في نص العربية، أو آثار تقطيع ولحام مش بنفس جودة لحام المصنع، دي علامة مقلقة جدًا. كمان اختلاف لون الدهان أو وجود طبقة رش زيادة في جزء معين من الأرضية ممكن يدل إن فيه شغل تم هناك.

كمان مهم تبص على رقم الشاسيه كويس. الرقم لازم يكون محفور بشكل منتظم ومفيش حواليه آثار صنفرة أو إعادة دهان. أي اختلاف في شكل الحفر أو مكان الرقم ممكن يكون مؤشر إن فيه تلاعب حصل.

فى عوامل تانية عشان تعرف لو العربية مغيرة نص أو عشان تكتشف إذا حصل أي تغييرات في العربية قبل كده أو لأ هنعرفها في المقال ده

إزاي تعرف إن السيارة راشة برة؟

يفضل تروح تشوف السيارة في ضوء النهار وفي مكان مشمس عشان الإضاءة تكون واضحة، وأول شئ تقوم بيه هو الوقوف من كل جهات السيارة تراجع النقط دي:

• الحالة العامة للسيارة والخدوش والخبطات الواضحة؛ وابدأ في تتبع الخدوش والخبطات وحاول تشوف مداها واصل فين ومسمعة لحد فين. 
• لو في شئ مش متماثل في تقفيل السيارة، يعني مثلًا لو الكابوت (Car Hood) مش قافل على وش السيارة في الناحية اليمين والشمال زي بعض، يكون قافل على ناحية أوسع من ناحية تانية مثلًا، وهكذا في الأبواب والشنطة وباقي الأجزاء اللي فيها إمكانية للتماثل (Symmetry)، وابدأ من هنا تتبع باقي الفحص عشان تفهم ايه اللي تم على السيارة.  

•  غيّر زاوية الرؤية عشان تلاحظ أي تغيير واضح في اللون أو في خطوط الإضاءة على السيارة (انبعاجات أو تموجات)، تأكد إن التغيير ده مش جاي من اختلاف المادة المطلية، لكن اختلاف على نفس المادة سواء الصاج (المعدن) أو الفيبر (البلاستيكات زي الاكصدام).

أنواع التغييرات في لون السيارة:

• • تموجات ناعمة ومفيهاش أي اختلاف في الملمس، في الغالب ده هيكون أثر طبقات المعجون الكتير اللي اتعمجن بيه الجزء ده أثناء الرش.  
  • انبعاجات فيها تعريجات تحت إيدك ، في الغالب ده معناه إنه تم رد الجزء ده على البارد -يعني تم سمكرته بدون لهب وبدون إزالة طبقة الدهان الأصلية- أو إن الجزء ده مرشوش بالفعل، ولكن طبقة المعجون مش موحدة، ده بيبان أوي في حروف الأبواب والكبوت والشنطة …إلخ.  
  • ملمس خشن متكرر بشكل غير منتظم، ده دليل قوي إن السيارة تم رشها وفي مكان غير معزول أدى لتراكم حبيبات التراب عليه مسببًا الملمس الخشن ده.

أدلة تانية إن السيارة راشة بره:

• بص على الكاوتشات (Rubber) اللي حوالين الزجاج أو الأبواب، وكذلك تحت أوكرة الأبواب لو عليها بقايا نقط دهان؛ ده معناه إن الجزء ده اترش، واللي رشه معزلش كويس الكاوتشات دي. 
• نفس النقط ممكن تبقى موجودة في أماكن تانية مش في مكانها، بمعنى إنها المفروض متكونش مرشوشة زي الدواخل، أو مرشوشة بس المفروض بلون تاني.

فحص تكليح السيارة 

إيه هو تكليح السيارة؟

  التكليح (Clear Coat Oxidation/Peeling) هو عبارة عن تآكل الطبقة الخارجية للورنيش نتيجة لعوامل زي التعرض الطويل للشمس أو الغسيل المتكرر. بيظهر التكليح كطبقة بيضاء بشكل متقطع أو طبقة أفتح من لون الدهان الأساسي. التكليح ده مش شرط -على عكس الشائع- يكون علامة إن السيارة فبريكا (مصطلح السوق إنها مش راشة)، ببساطة ممكن العربية تكون رشت وبعدين كلحت بعد كده أو -في حالات الغش القصوى- بيتم تكليحه عمدًا عشان تبان السيارة فبريكا! 

إزاي تعرف إن السيارة راشة دواخل؟ 

 واحدة من أصعب الخطوات إن لم تكن أصعبها، هي فحص إن كانت السيارة راشة دواخل، وده لإن الفحص ده بيتطلب عين خبيرة جدًا وبعض الأدوات والمعدات أحيانًا للتأكد من حالة الإصلاحات على الهيكل، بس هنحاول هنا نقولك على أشهر الحاجات اللي ممكن تلاحظها بعينك وممكن تديك مؤشر بشكل ما على احتمالية الرش:

• فحص التربيطات الداخلية 

الشاسيه أو الهيكل بيتكون من عدة مكونات بيتم تجميعها مع بعض باللحام أو عن طريق المسامير والصواميل، بيتم اعتبار المسامير والصواميل دي جزء من الهيكل وبالتالي بيتم رشها معاه في المصنع بطبقات الحماية من الصدا وطبقات الدهان المختلفة للهيكل الداخلي. 

بعض الشركات بتحط ختم إضافي عليهم عشان تعرف لو حصل واتفكوا بعد كده، لكن سواء بالختم أو لأ تقدر تعرف إذا كان المسمار أو الصامولة اتفكوا قبل كده أو لأ.

• إزاي تعرف إن تم فك المسمار أو الصامولة؟

عن طريق خدوش أو علامات تأكل الدهان الأولي للمسمار أو الصامولة نتيجة احتكاكها مع المفك أو المفتاح اللي فكهم وبالتالي ده بيدينا مؤشر إن الجزء ده اتفك للتغيير أو التصليح، مهمتك بعد كده بتتبع الجزء اللي اتفك زي ما اتعودنا عشان تقدر تشوف باقي الدلائل عشان تفهم ايه اللي حصل بالظبط والخبطة سمعت لحد فين.

آثار فك مسامير في شاسيه السيارة

آثار فك مسامير في شاسيه السيارة

فحص اللحامات 

 لحامات المصنع بيبقى ليها أشكال معروفة، أشهرهم المعروفة باسم (ذُنب Spot Welding) للأماكن اللي بتجمع جزئين مسطحين مع بعض، وبتبقى عبارة عن شكل دوائر صغيرة مضغوطة للداخل حاجة بسيطة، وعلى الرغم إن ماكينات اللحام اللي بتلحم بالشكل ده موجودة، بس أدائها مش بيوصل لأداء الروبوتات اللي بتلحم في المصنع؛ لا في انتظام ولا جودة اللحامات، إلا لو كان الصنايعي اللي لحم فاهم كويس جدًا إزاي يحاكي لحامات المصنع، ساعتها هيكون صعب على غير الخبير إنه يلاحظ الفرق. 

إزاي تفحص الذُنب؟

• الخط اللي بيتلاقى فيه السقف مع قوايم الأبواب، الجزء ده بيكون متغطي بكاوتش مطاط، بيتشال ويتركب بسهولة، لو شاكك إنك مش هتعرف ترجعه زي ما كان يبقى سيب الجزء ده للمحترف، عشان البايع ميضايقش منك! لكن لو هتعرف تعمل كده، تتبع سير الذُنب وإنها بنفس الشكل والتباعد على طول الخط وممكن تقارن بين الجانبين الشمال واليمين عشان تتأكد من إن الذُنب لها نفس النمط على الناحيتين.
• مهم كمان لو لقيت الخط ده بينتهي مرة واحدة وبقى ناعم مثلًا من غير شكل الذُنب في نص الخط مثلًا، ساعتها بشكل شبه مؤكد الجزء ده تمت معالجته ومعجنته. 
• باقي أنواع اللحامات -وإن كانت قليلة ونادرة- هيكون واضح جدًا لو إن اللحام ده معمول خارج المصنع لإنه شكله ومكانه هيكون غريب وغير متسق.

بشكل عام الهدف من اكتشاف اللحامات اللي مش معمولة في المصنع هي محاولة لفهم ومعرفة إذا كانت السيارة عملت حادثة ومدى تأثير الحادثة دي على شاسيه السيارة، فتتبع دايمًا أي لحام أو نمط غريب أو مش في مكانه أو بمادة أو طريقة باين عليها إنها مش احترافية، ساعتها يفضل تشيل السيارة دي من اختياراتك.

فحص السمكرة

المقصود بالسمكرة هو الإصلاحات اللي بتم على المعدن بشكل عام في العربية سواء كان الجسم الخارجي أو الهيكل.

 في أنواع كتير للسمكرة زي السمكرة على البارد أو باللهب أو الاستعدال. السمكرة الداخلية على الهيكل أصعب في ملاحظتها من السمكرة على الجسم الخارجي، لإن السمكرة الخارجية بكل أنواعها لازم هتأثر على حالة الدهان الخارجية، وسواء تم رش دهان ولا، هتقدر تلاحظها لو مشيت على الخطوات اللي فاتت؛ لكن السمكرة الداخلية مش لازم تتطلب إعادة رش الأجزاء اللي اتسمكرت عشان مفيش طبقات دهان خارجية بالضرورة.

السمكرة الداخلية بتبان في كذا حاجة منها مثلًا التعريجات غير منتظمة، أو التعريجات اللي حتى مش في مكانها. كذلك برضه، التقشير اللي في المعدن نتيجة إما الطرق عليه أو الشد. التقشير في طبقات الدهان الداخلية غالبًا بيصاحبه طبقة رقيقة من الصدا زي الصورة.

خاتمة

في النهاية لازم تعرف إن عملية فحص السيارة المستعملة صعبة والمتخصصين بيلاقوا صعوبات كبيرة أحيانًا في تحديد حالة السيارة، لذلك -وتكرارًا للنصيحة- اقرأ المقالة دي  كدليل إرشادي في الفحص الأولي للسيارات، اللي بعده هتقدر تفلتر السيارات المرشحة عشان تجيب المختص معاك في الزيارة التانية للسيارة ويقول رأيه في حالة السيارة.

لو عاوز تختصر على نفسك الوقت والمجهود وتشتري عربية مستعملة مضمونة من غير مشاكل أو تعقيدات، تقدر تشوف كل العربيات المستعملة الموجودة على سيلندر وتشتري العربية اللي عاوزها بالطريقة المناسبة سواء كاش أو تقسيط.

قولولنا في التعليقات ايه أكتر معلومة فاجأتكم وكانت جديدة عليكم؟