آخر تحديث: أكتوبر 2026
الخلاصة: أرخص عربية كهرباء سعرها معلن رسميًا في مصر دلوقتي هي شيفروليه سبارك EUV بـ 950,000 جنيه، وبعدها شيفروليه كابتيفا EV بـ 1,399,000 جنيه وكيا EV3 بـ 1,400,000 جنيه. الجمارك على العربيات الكهرباء صفر حسب تعريفة مصلحة الجمارك، بس عليها ضريبة القيمة المضافة 14%، في بعض الأحيان بيتم إضافة ضرايب تانية حسب نوع العربية. الأسعار دي رسمية، وسعر المعرض ممكن يختلف، فاتأكد من الوكيل قبل ما تدفع.
أسعار العربيات الكهرباء في مصر 2026
السعر الرسمي لكل عربية من موقع الوكيل، والمدى زي ما الوكيل كاتبه.
| الموديل | السعر | المدى المعلن |
|---|---|---|
| شيفروليه سبارك EUV (Chevrolet Spark EUV) | 950,000 جنيه | 360 كم |
| شيفروليه كابتيفا EV (Chevrolet Captiva EV) | 1,399,000 جنيه | لحد 415 كم |
| كيا EV3 (Kia EV3) | من 1,400,000 لـ 2,050,000 جنيه | لحد 600 كم |
| شيري eQ7 (Chery eQ7) | يبدأ من 1,599,000 جنيه | 512 كم |
| كيا EV5 (Kia EV5) | من 2,050,000 لـ 2,550,000 جنيه | غير معلن |
| تويوتا bZ4X (Toyota bZ4X) | من 2,200,000 لـ 2,380,000 جنيه | من 481 لـ 567 كم |
| كيا EV6 (Kia EV6) | من 2,300,000 لـ 3,000,000 جنيه | لحد 600 كم |
| إم جي سايبرستر (MG Cyberster) | 2,850,000 جنيه | لحد 600 كم |
| كيا EV9 (Kia EV9) | من 3,700,000 لـ 3,800,000 جنيه | غير معلن |
قارن المدى المعلن لكل عربية بحذر، لأن المدى الفعلي بيختلف حسب سرعتك والتكييف وطريقة سواقتك، وكل وكيل بيقيسه بمعيار مختلف.
عايز تقارن بأسعار العربيات البنزين؟ شوف أسعار العربيات الجديدة في مصر 2026.
عربيات كهرباء موجودة في مصر بس سعرها غير معلن
بعض الوكلاء عارضين عربيات كهرباء على مواقعهم الرسمية لكن بدون سعر. العربيات المعروضة هي:
- بي واي دي (BYD): دولفين سيرف (Dolphin Surf) وسيلاين 6 (Sealion 6)
- إكس بنج (Xpeng): M03 وP7+ وG6 وG9
- زيكر (Zeekr): X و7X و001
- أفاتر (Avatr): 11 و12
- ديبال (Deepal): S05 وS07
- هيونداي (Hyundai): أيونيك 5 وأيونيك 6 وأيونيك 9 (IONIQ)
- دونج فينج (Dongfeng): بوكس (Box)
- بايك (BAIC): EU5
- هونشي (Hongqi): EQM5 وE-HS9
- بي إم دبليو (BMW): i4 وi5 وi7 وiX1 وiX2 وiX3
- مرسيدس (Mercedes-Benz): CLA وGLC وG الكهرباء
- فولفو (Volvo): EX30 وES90
- بورشه (Porsche): تايكان وماكان وكايين الكهرباء، وسعرها معلن بالدولار مش بالجنيه
هل العربيات الكهرباء عليها جمارك في مصر؟
حسب التعريفة الجمركية المنشورة على موقع مصلحة الجمارك، العربيات الكهرباء بالكامل جمركها صفر، لكن بيتم حساب ضريبة القيمة المضافة 14%، وفي بعض الأحيان بيتم إضافة ضرايب مختلفة حسب نوع العربية. العربيات اللي فيها موتور بنزين بيشحن البطارية (Range Extender) عليها جمرك 10%.
إزاي بيتحسب سعر شحن العربية الكهرباء؟
في المحطات العامة، سعر الشحن بيتحسب بالمعادلة دي (قرار وزير الكهرباء رقم 101 لسنة 2025):
سعر وحدة الكهربا اللي بتدفعه = سعر وحدة الكهربا اللي المحطة بتشتري بيه × رقم ثابت حسب نوع الشحن
| نوع الشحن | الرقم الثابت |
|---|---|
| الشحن العادي (AC لحد 22 كيلووات) | × 1.45 |
| الشحن السريع (DC) | × 2.8 |
مثال بأرقام افتراضية: لو المحطة بتشتري وحدة الكهربا بـ 1 جنيه، هتدفع 1.45 جنيه في الشحن العادي و2.8 جنيه في الشحن السريع. يعني الشحن السريع بيتحسب تقريبًا ضعف العادي.
ودي شركات شحن مرخصة من جهاز تنظيم مرفق الكهرباء:
- إنفينيتي (Infinity EV)
- السويدي بلج (Elsewedy Plug)
- شاحن
- ميجا بلج
أنهي عربية كهرباء تناسب ميزانيتك واستخدامك؟
- ميزانيتك حوالي مليون جنيه: سبارك EUV هي الوحيدة في الجدول تحت المليون.
- ميزانيتك لحد مليون ونص: كابتيفا EV أو أول فئة من كيا EV3.
- بتسافر كتير: قارن المدى المعلن، واعرف أماكن الشحن السريع على طريقك قبل ما تشتري.
- أيًا كانت العربية، اسأل عن ضمان البطارية: كل وكيل ليه ضمان مختلف، مثلًا شيفروليه كاتبة 8 سنين أو 160,000 كم على بطارية سبارك EUV.
مميزات وعيوب العربيات الكهرباء
| المميزات | العيوب |
|---|---|
| مفيش تغيير زيت موتور ولا بوجيهات | محطات الشحن لسه أقل بكتير من البنزينات |
| العربية هادية في السواقة | الشحن بياخد وقت أطول من تفويل البنزين |
| جمركها صفر حسب تعريفة مصلحة الجمارك | سوق المستعمل لسه صغير، فسعر إعادة البيع مش واضح زي العربيات البنزين |
أسئلة شائعة
إيه أرخص عربية كهرباء في مصر؟ شيفروليه سبارك EUV بـ 950,000 جنيه، ده أرخص سعر رسمي معلن على مواقع الوكلاء في أكتوبر 2026.
هل صحيح إن الجمارك رجعت على العربيات الكهرباء؟ لأ، لحد دلوقتي. التعريفة المنشورة على موقع مصلحة الجمارك لسه جمركها صفر، وأي تغيير لازم يطلع بقرار رسمي.
ينفع أشتري عربية كهرباء مستعملة؟ أيوه، بس اتأكد من حالة البطارية والمدى الفعلي، واسأل عن ضمان البطارية اللي فاضل. اعرف إزاي تفحص العربية قبل الشراء.
بتدور على عربية بسعر أقل؟ تصفح عربيات سيلندر المستعملة المفحوصة